Қайғылы жағдай 2 қазан күні Жамбыл облысының Ботамойнақ ауылында орын алды. Миятбек ауыл жастары жиналатын футбол алаңына барған. Кейін әкесіне ұлының соққыға жығылғаны туралы хабар жеткен.
Оқушының әкесі алаңға келгенде Миятбек ес-түссіз жатқан. Баланы есін жиғызуға тырысқанымен, нәтиже болмаған. Оқиға орнына жеткен жедел жәрдем қызметкерлері жасөспірімнің көз жұмғанын хабарлады.
Марқұмның туыстары мұны футбол кезінде болған кездейсоқ жанжал емес деп есептейді. Олардың айтуынша, сол кеште ересек балалар кішілерді қатарға тұрғызып, кезекпен ұрған. Мұны олар «тәрбиелеу» деп атаған. Миятбек кезектің соңында тұрған. Кеудесіне тиген соққыдан кейін ол жерге құлады.
Миятбектің әкесі ауыл жасөспірімдері арасында мұндай жағдай бұған дейін де болуы мүмкін екенін айтады. Кейбір ауыл тұрғындары да үлкендердің кішілерді осылай «тәрбиелейтіні» туралы журналистерге айтқан. Алайда жасөспірімдер арасында мұндай әлімжеттік жүйелі түрде болғаны әзірге ресми расталған жоқ. Бұл жайттарды тергеу анықтауы тиіс.
Қаза болған Миятбек пен 16 жастағы күдікті бір-бірін таныған және бір лицейде оқыған. Олардың отбасылары да көрші тұрады.
Жерлеу рәсімінен кейін күдіктінің туыстары ауыл ақсақалдарымен бірге Миятбектің отбасына барып, кешірім сұраған. Марқұмның анасы Айгүл Абзалиева олардың жасөспірімді кешіргенін айтқан. Оның сөзінше, бұған дейін екі отбасының арасында жанжал болмаған.
Ата-ананың күдіктіні кешіргеніне қарамастан, қылмыстық іс бойынша тергеу жалғасып жатыр. Күдікті қамауда. Іс абайсызда адам өліміне әкеп соққан денсаулыққа қасақана ауыр зиян келтіру дерегі бойынша тергелуде.
Байзақ аудандық білім бөлімінің мәліметінше, оқиға сабақтан тыс уақытта болған. Қайғылы жағдайдан кейін жасөспірімдер мен олардың ата-аналары арасында профилактикалық жұмыс күшейтілген.
Жамбыл облысының Полиция департаменті тергеу жалғасып жатқанын хабарлады.
