Жарияланған кадрларда жүргізуші гүл шоғын ұстап, сыйға берілген көліктің жанында тұр. Ол бұл тартуды өзіне көрсетілген құрмет пен жылы ықыластың белгісі деп қабылдағанын жеткізді.
«Бауырлас қазақ халқы, бүгін сіздер мені қуантып қана қоймай, жүрегімді жылыттыңыздар. Уәделеріңізде тұрып, осындай құрмет көрсеткендеріңіз үшін шын жүректен алғыс айтамын!» — деп жазды Жамгырчиева қырғыз тілінде.
Жүргізуші екі халықтың жақындығына да тоқталды. Оның айтуынша, мемлекеттік шекара қазақ пен қырғыздың жүрегін бөле алмайды. Қос халықты ортақ тарих пен үндес тіл байланыстырады.
Айзада Жамгырчиева бұған дейін Дүниежүзілік көшпенділер ойындарында Қазақстан құрамасын ерекше ықыласпен таныстырып, көпшіліктің назарын аударған еді. Осыдан кейін қазақстандықтар оған автокөлік сыйлауға уәде берген.
Айзада өзіне құрмет көрсеткен азаматтарға ізгі тілегін білдіріп, олардың жақсылығы еселеп қайтуын және қазақ-қырғыз достығының берік болуын тіледі.
