Премьер-министр Олжас Бектенов қазақстандық өндірушілер өз өнімдерін сауда желілеріне орналастыруда әлі де қиындықтарға тап болып отырғанын, сондай-ақ негізсіз ақпараттық шабуылдардың нысанына айналып жатқанын мәлімдеді.
«Қазақстанда өндірілген танымал тауарлардың беделін түсіруге бағытталған әдейі ұйымдастырылған ақпараттық науқандар кездесіп жатады. Бұл бір ғана мақсатпен — бәсекелесті ығыстырып, нарықты жаулап алу үшін жасалады», — деді Бектенов.
Осыған байланысты Мәдениет және ақпарат министрлігіне басқа да мемлекеттік органдармен бірлесіп, «Қазақстанда жасалған» брендін ілгерілету және отандық өнімді қорғау бойынша бірыңғай ақпараттық науқан жүргізу тапсырылды.
Сонымен қатар, Үкімет басшысы сауда желілерінің иелері қазақстандық тауарларға деген көзқарасын өзгертуі тиіс екенін баса айтты.
«Отандық өнімді ысырып, импорттық тауарларға басымдық беру құқықтық жағынан ғана емес, моралдық тұрғыдан да дұрыс емес», — деп атап өтті ол.
Сауда министрлігіне әкімдіктермен және «Атамекен» ҰКП-мен бірлесіп, отандық өндірушілерге сауда алаңдарын жалға алудың қолжетімді шарттарын қамтамасыз ететін және олардың ішкі нарықтағы үлесін арттыратын тетіктерді қысқа мерзімде әзірлеу тапсырылды.
Отандық өнімді қолдап, тек шынайы ақпарат оқыңыз. Еліміздің басты саяси және экономикалық жаңалықтары — SHYNDYK.KZ порталында.
