«Әділет» партиясынан Құрылтай депутаттығына кандидат Асхат Аймағамбетов SHYNDYK.KZ порталына берген арнайы шағын сұхбатында алдағы сайлау науқанына қатысты болжамдарымен бөлісіп, сайлауалды бағдарламаның басты басымдықтарына тоқталды.
Бас редактор Ғазиза Райымбекпен әңгіме барысында саясаткер Ұлытау мен Қарағандыдан бастап Түркістан мен Оралға дейінгі өңірлердегі жұмыс сапарларында азаматтардың жоғары сенімі мен белсенділігін байқағанын атап өтті. Оның айтуынша, сайлаушылар партияның сайлауалды тұғырнамасынан нақты әрі шынайы іс-қимыл жоспарын көріп отыр.
«Меніңше, бұл сөзсіз жеңіс болады, мәселе оның қаншалықты айқын болатындығында ғана. Біздің сайлаушылар бағдарламаны көріп отыр: ол өте нақты, кешенді және жүйелі. Біз үй-үйді аралап, базарларда адамдармен кездесіп жатырмыз, барлық жерде үлкен қолдау мен өзгерістерге деген ұмтылыс сезіледі», – деп баса айтты Асхат Аймағамбетов.
«Әділет» партиясының қарсыластарынан басты айырмашылығына тоқталған кандидат популизмнен бас тартып, әсіресе адами капиталды дамыту саласындағы өлшенетін нақты нәтижелерге бағытталғанына назар аударды.
«Әділет – нақты істер партиясы. Бізде орындалмайтын уәделер жоқ. Бағдарламамыздағы адами капитал блогын алайықшы: мектепке дейінгі ұйымдарда 79 мың жаңа орын, мектептерде 300 мың жаңа орын. Бұл біз жауап беретін нақты сандар. Бағдарламамыз кабинеттерде жазылған жоқ, ол тікелей азаматтардың аманаттары мен тілектерінен құралған», – деді кандидат.
Сұхбат соңында Асхат Аймағамбетов қазақстандықтарды азаматтық белсенділік танытып, 23 тамызда сайлау учаскелерінде жүйелі өзгерістер үшін дауыс беруге шақырды.
Ең өзекті және маңызды саяси жаңалықтарды, сондай-ақ толық сұхбатты SHYNDYK.KZ сайтынан оқи аласыздар.
