Eurasian Resources Group қожайындарының құрамында өзгерістер болды. 4 тамыздан бастап ERG-дің 40% көлеміндегі мемлекеттік пакеті «Самұрық-Қазына» қорының меншігіне өтті.
Ең бастысы, мемлекет компаниядағы өз үлесін сатқан жоқ әрі азайтқан жоқ. Тек осы акциялар пакетін тікелей басқаратын құрылым ғана өзгерді. Бұрын бұл үлес Қаржы министрлігінің Мемлекеттік мүлік және жекешелендіру комитеті арқылы мемлекеттің меншігінде болса, енді оған «Самұрық-Қазына» иелік етеді.
Қордың өзі бұл активтің берілуін өзінің негізгі міндетімен – ірі мемлекеттік активтерді басқарумен түсіндіріп отыр.
ERG Қазақстан өнеркәсібінде елеулі орын алады. Бұл топ тау-кен және металлургия салаларындағы ірі кәсіпорындардың басын біріктіретін еліміздегі ең үлкен жұмыс берушілердің бірі саналады.
Пакет табысталғаннан кейін де мемлекеттің ERG-дегі үлесі бұрынғысынша 40% күйінде қалады.
Қалған 39,3% акция кәсіпкер Шахмұрат Мүтәліпке тиесілі болса, 20,7 пайызы топтың негізін қалаушылардың бірі Әліжан Ибрагимовтың мұрагерлеріне тиесілі.
Осылайша, бұл жерде әңгіме ERG-ді жекешелендіру немесе мемлекеттік үлеске жаңа жекеменшік қожайынның келуі туралы емес. Үкімет өз пакетін тек ұлттық қордың басқаруына берді.
Бұл туралы SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
