Қазақстанда қоғамда үлкен резонанс тудырған іс бойынша қаза тапқан Нұрай Серікбайдың туыстары сотталушы Шерхан Аймаханнан 10 миллиард теңге көлемінде өтемақы талап етіп отыр. Марқұмның ағасы Сұлтан Серікбай бұл соманың кездейсоқ таңдалмағанын мәлімдеді.
SHYNDYK.KZ редакциясының хабарлауынша, Сұлтан Серікбайдың айтуынша, бұл шешімнің астарында маңызды мақсат жатыр. «Сотталушы тарап келтірілген шығынды толық өтемейінше, жазадан жалтарып, шартты түрде мерзімінен бұрын босауды немесе басқа да жеңілдіктерді пайдалануға ешқандай мүмкіндігі болмауы тиіс», — деді ол.
Сұлтанның сөзінше, өтемақы көлемі жазаны жай ғана ақша төлеп жауып тастауға мүмкіндік бермейтіндей дәрежеде үлкен болуы тиіс. «Егер біз өмір бойы Нұрайды жоғалтудың ауыр қайғысымен өмір сүруге тиіс болсақ, онда айыпты тарап та өз жауапкершілігін, соның ішінде материалдық жауапкершілікті толық сезінуі керек», — деді марқұмның ағасы.
Айта кету керек, отбасы бұл қаражатты жеке бастың мүддесіне жұмсамақ емес. Өтемақы ретінде түскен қаржы сталкингке және зорлық-зомбылықтың басқа да түрлеріне тап болған қыздарға көмек көрсетуге бағытталады.
