Алматы әуежайының терминалы жанына аялдағандарға айыппұл салу мәселесі көптің талабымен оң шешімін тапты. Жүргізушілердің толассыз шағымы мен қоғамдағы үлкен резонанстан кейін бұрынғы шектеулер қайта қаралды.
SHYNDYK.KZ хабарлағандай, нәтижесінде аумақтағы «Тоқтауға тыйым салынады» белгісі алынып, орнына «Тұраққа қоюға тыйым салынады» белгісі орнатылды. Енді көлік иелері жолаушыларын мінгізіп немесе түсіріп кету үшін терминал маңына бес минутқа дейін тоқтай алады.
Еске сала кетейік, бұған дейінгі қатаң тыйым халықтың қатты ашуын тудырған еді. Көлік тізгіндегендер ұшақтан түскен жақынын алып кету үшін санаулы минутқа ғана тоқтағанның өзінде айыппұл арқалап жатқанына шағымданған болатын. Бұл жағдай әлеуметтік желілер мен бұқаралық ақпарат құралдарында қызу талқыға түсті.
Аталған мәселені біздің редакциямыз да назардан тыс қалдырмай, көлік иелерінің орынды талабын жариялаған еді. Ақыры жауаптылар ережені ретке келтіріп, терминал маңына қысқа уақытқа аялдауға мүмкіндік берді. Дегенмен, көлікті сол аумақта қалдырып кетуге немесе жолаушыны ұзақ уақыт күтіп тұруға бұрынғыша қатаң тыйым салынатынын ескеру қажет.
