Жапонияның Tokyo Metropolitan University жоғары оқу орны халықаралық Tokyo Global Partner Scholarship Program стипендиялық бағдарламасына өтініштер қабылдауды бастады. Бұл бағдарлама Жапонияда білімін жалғастырып, магистр немесе доктор дәрежесін алғысы келетін шетелдік студенттерге арналған.
Байқау жеңімпаздары үшін университет оқу ақысы мен кіру жарнасын толықтай өтейді. Сонымен қатар, стипендия аясында студенттің халықаралық әуе билетінің құны да қарастырылған. Оқу кезеңінде студенттерге ай сайын 150 мың иен көлемінде шәкіртақы төленіп отырады.
Үміткерлер оқу бағыттарын өз таңдаулары бойынша іріктей алады. Атап айтқанда:
-
жаратылыстану ғылымдары;
-
қалалық экология;
-
жүйелік дизайн;
-
адам денсаулығы туралы ғылымдар және басқа да мамандықтар бойынша білім алу мүмкіндігі бар.
Аталмыш бағдарлама әлемнің түкпір-түкпірінен перспективалы жас зерттеушілерді тарту және халықаралық ғылыми-білім беру әріптестігін кеңейту мақсатында құрылған.
