Қазақстан қазіргі уақытта «Атырау – Самара» бағыты және әрі қарай «Дружба» мұнай құбыры арқылы Германияға мұнай экспорттауды тоқтата тұрады. Инфрақұрылымдық кедергілер жойылып, тиісті келісімдер жасалғаннан кейін тасымал қайта жандануы мүмкін. Бұл туралы Қазақстанның Энергетика министрлігі ТАСС агенттігіне мәлімдеді, деп хабарлайды SHYNDYK.KZ.
1 мамырдан бастап қазақстандық мұнай Германияға балама бағыттармен жіберіліп жатыр. Атап айтқанда, Энергетика министрлігі мұнай көлемі Ресейдің Усть-Луга порты мен Каспий құбыр консорциумы (КҚК) жүйесіне бұрылғанын хабарлаған еді.
«Қазіргі кезде Қазақстан мұнайын “Атырау – Самара – Дружба” бағыты бойынша Германияға жеткізу транзит жағындағы инфрақұрылымдық және техникалық шектеулерге байланысты уақытша жүзеге асырылмайды», – деп түсіндірді ведомстводағылар.
Министрлік өкілдері кедергілер реттеліп, барлық мүдделі тараптар өзара келісімге келген жағдайда «Дружба» арқылы экспорт қайта басталуы мүмкін екенін қосты. Бұған дейін ведомство шілде мен тамыз айларында бұл бағыт бойынша мұнай тасымалдау жоспарда жоқ екенін мәлімдеген болатын.
