Бұл жолы қатысушыларға «екіге екі» форматы ұсынылып, ол пікірталастың сипатын айтарлықтай өзгертті. Партиялардың кезекпен сөйлейтін дағдылы барысының орнына эфир көзқарастардың бетпе-бет тоғысуына, қарсыластарға тікелей сұрақ қоюға және өз бастамаларын сол сәтте дәлелдеуге негізделді.
Екі сағатқа созылған дебаттың басты тақырыптарының бірі – «Заң мен тәртіп – әділетті Қазақстанның негізі» қағидаты болды. Қатысушылар саяси бағдарламаларды нақты заңнамалық шешімдер арқылы қалай жүзеге асыруға болатынын және сайлаушыларға қандай тетіктер ұсына алатындарын ортаға салды.
«Әділет» партиясының атынан қатысқан экс-прокурор Айжан Аймағанова мен адвокат Мәди Мырзағараевтың сөздері ерекше назар аудартты. Олар өз жауаптарында қолданыстағы заңнамаға, енгізілуі мүмкін түзетулерге және бастамаларды жүзеге асырудың нақты тәжірибелік тетіктеріне баса мән берді.
Пікірталастың елеулі бөлігі экономикалық және әлеуметтік мәселелерге арналды. Партия өкілдері салық саясаты мен бизнеске жасалатын жағдайлар төңірегінде тартысып, азаматтарды жалғыз баспанасынан айырылып қалудан қорғауды, әлеуметтік кепілдіктер мен лудоманияға қарсы күрес шараларын талқылады. «Байтақ», ҚХП, «Ақ жол», Respublica, ЖСДП, «Ауыл» және «Әділет» өкілдері өзара тікелей сұрақ-жауап алмасты. Мұндай формат қатысушылардан тек өз бағдарламасын таныстырып қана қоймай, бәсекелестердің сынына да жедел жауап беруді талап етті.
Эфирдің маңызды бөлігі – ҚҚДИ (КИОР) интерактивті дауыс беруі болды. Оның нәтижелері дебат барысында спикерлердің сөзіне көрермендердің қалай баға бергенін нақты уақыт режимінде көрсетті.
Сайлауға бір апта қалғанда үгіт-насихат додасы шешуші кезеңге аяқ басты. Енді партиялар сайлаушыларды құрғақ уәдемен емес, жаңа Құрылтайда қолға алатын нақты ұсыныстарымен иландыруы тиіс.
Сайлау 23 тамызда өтеді. Дәл сол күні сайлаушылар қай саяси күштердің Құрылтайға өтетінін анықтайды.
Үшінші теледебаттың ең тартысты сәттері мен егжей-тегжейін SHYNDYK.KZ YouTube-арнасынан көріңіздер.
