Сауда-саттық басындағы аздаған ауытқуларға қарамастан, мұнай нарығы геосаяси факторлардың ықпалында қалып отыр. Өткен аптада екі эталондық марка да 5%-дан астам қымбаттаған. Таяу Шығыстан шикізат тасымалдаудың тұрақтылығына қатысты қауіпті күшейткен мұнай нысандары мен танкерлерге жасалған шабуылдардан кейін бағаның өсуі үдей түсті.
Нарық қатысушыларының басты назарында мұнай тасымалдаудың ең маңызды бағыттарының бірі – Ормуз бұғазы қалып отыр. Бұл аймақтағы кеме қатынасының кез келген іркілісі жаһандық тасымалға, тиісінше, шикізат құнына да кері әсер етуі мүмкін.
Демалыс күндері бұғаз арқылы кемелердің өтуі айтарлықтай азайды. Мониторинг мәліметіне сүйенсек, сенбі күні одан небәрі бес жүк кемесі өтсе, жексенбіде бірде-бір кеме тіркелмеген. Бұл жағдай нарық қатысушыларын оқиғаның одан әрі қалай өрбитінін жіті бақылауға мәжбүрлеп отыр.
АҚШ пен Иран арасындағы қарым-қатынас та қосымша белгісіздік тудыруда. Тараптардың келіссөздері әзірге шиеленісті айтарлықтай бәсеңдете қойған жоқ, сондықтан жағдайдың одан әрі ушығу қаупі мұнай бағасында әлі де ескеріліп отыр.
Дегенмен Brent пен WTI бағасының екі түрлі бағытта құбылуы нарықтың әзірге бірыңғай тенденцияға көшпегенін көрсетеді. Трейдерлер бағаны шарықтатуы мүмкін геосаяси тәуекелдерді де, сұраныс пен ұсынысқа әсер ететін басқа да факторларды да саралап жатыр.
Мұнай бағасының бұдан былайғы динамикасы көбіне Ормуз бұғазындағы жағдайға және Таяу Шығыстағы шиеленістің бәсеңдеу-бәсеңдемеуіне байланысты болмақ.
