Мемлекет басшысына «Талдау орталығының» жұмысы таныстырылып, жасанды интеллект технологияларына негізделген сараптамалық құралдар көрсетілді.
Соның ішінде Президентке педагогтерге арналған WONK ЖИ-көмекшісі таныстырылды. Цифрлық сервис мұғалімдердің сабаққа дайындалуына және оқу материалдарын әзірлеуіне көмектеседі.
Қасым-Жомарт Тоқаев үшінші сынып оқушыларына арналған математика сабағынан үзінді де көрді. Сабақ барысында Qalam AI, Beyim AI, TopIQ және E-OQULYQ цифрлық білім беру платформалары қолданылды.
Сонымен қатар Мемлекет басшысына балаларға арналған заманауи басылымдар, соның ішінде әлем әдебиеті туындыларының қазақ тіліндегі аудармалары ұсынылды.
Көрменің жеке бөлігі қазақстандық оқушылардың жетістіктеріне арналды. Президентке олардың ғылым, инженерия, роботтехника және инновация саласындағы жобалары таныстырылды.
«Білім болашағы» көрмесіне педагогтерге арналған цифрлық құралдар, оқу платформалары, заманауи басылымдар мен оқушылардың әзірлемелері қойылды. Экспозицияда Қазақстанның білім беру жүйесін дамытудың негізгі бағыттары көрсетілді.
