Әскерге шақыруды кейінге қалдыруға немесе одан босатылуға құқығы жоқ 18 бен 27 жас аралығындағы ер азаматтар мерзімді қызметке шақырылады.
12 мыңнан астам азамат Қарулы күштер қатарына, 7 мыңға жуық адам Ұлттық ұланға жіберіледі. Тағы 3 мың азамат Ұлттық қауіпсіздік комитетінің Шекара қызметінде әскери борышын өтейді.
400-ден астам адам Төтенше жағдайлар министрлігінің бөлімшелерінде, ал 300-ге жуық азамат Мемлекеттік күзет қызметінде қызмет етеді.
Әскерге шақыру комиссиялары жұмысын бастады. Азаматтар әскери есепке қатысты мәліметтерді eGov порталындағы жеке кабинетінен тексере алады.
Мерзімді әскери қызметшілерге қызмет өткеру кезеңінде банк қарыздарын өтеу бойынша кейінге қалдыру мүмкіндігі беріледі.
Әскерден оралғаннан кейін олар Қазақстанның жоғары оқу орындарына ҰБТ тапсырмай түсуге үміткер бола алады. Мемлекеттік білім гранты конкурстық іріктеу нәтижесі бойынша беріледі.
