Әлназарова Денсаулық сақтау министрлігін 2024 жылғы ақпаннан бері басқарып келеді. Үкімет құрамына кіргенге дейін Қызылорда облысынан сайланған Парламент Сенатының депутаты болды.
Ақмарал Әлназарова 1971 жылы Қызылорда қаласында дүниеге келген. Алматы мемлекеттік медицина институтын «Педиатрия» мамандығы бойынша, сондай-ақ Қорқыт ата атындағы Қызылорда мемлекеттік университетін «Экономика» мамандығы бойынша тәмамдаған. Медицина ғылымдарының докторы.
Еңбек жолын Қызылорда қалалық балалар ауруханасының қабылдау бөлімінде дәрігер болып бастаған. Әр жылдары облыстық денсаулық сақтау басқармасында қызмет атқарып, Қызылорда облыстық балалар ауруханасы мен медициналық колледжді басқарған.
Сонымен қатар Әлназарова Қызылорда облысы денсаулық сақтау басқармасының басшысы және облыс әкімінің орынбасары қызметтерін атқарған. 2020 жылы Сенат депутаты болып сайланып, Денсаулық сақтау министрі қызметіне тағайындалғанға дейін Парламенттің жоғарғы палатасында жұмыс істеді.
