Құжат 31 тамызда Нью-Йоркте өткен Бас Ассамблея отырысында қабылданды. Қарарды 140 мемлекет қолдады, бір ел қарсы дауыс берді, тағы үшеуі қалыс қалды. Әлемнің әр өңірінен 32 мемлекет құжаттың тең авторы атанды.
Жаңа халықаралық күнді белгілеу туралы ұсынысты Президент Қасым-Жомарт Тоқаев 2025 жылғы қыркүйекте БҰҰ Бас Ассамблеясының 80-сессиясындағы жалпы пікірталас кезінде айтқан еді.
Қарар аумақтарды көгалдандыруға, табиғи экожүйелерді қалпына келтіруге және қоршаған ортаны қорғауға назар аударуды көздейді. Мемлекеттерге, халықаралық ұйымдарға, азаматтық қоғам мен өзге де мүдделі тараптарға тақырыптық іс-шаралар мен экологиялық акциялар өткізу ұсынылды.
Қазақстан Сыртқы істер министрлігі халықаралық бастаманың «Таза Қазақстан» жалпыұлттық акциясымен үндес екенін атап өтті. Жоба аумақтарды абаттандыруға, экологиялық мәдениетті арттыруға және қоршаған ортаға жауапкершілікпен қарауды қалыптастыруға бағытталған.
Қарардың қабылдануы Қазақстанның экологиялық күн тәртібін ілгерілету және орнықты даму саласындағы халықаралық ынтымақтастықты кеңейту жөніндегі жұмысының жалғасы болды.
