Сыйлық туралы Құрылтай депутаты әрі Қазақстанның «Көкпар» федерациясының президенті Айдарбек Ходжаназаров мәлімдеді. Бұған Бішкекте өткен VI Дүниежүзілік көшпенділер ойындарына қатысушылар шеруінде қазақстандық делегацияның ерекше ықыласпен таныстырылуы себеп болған.
Жамгырчиева Ойындардың ашылу және жабылу салтанаттарын жүргізді. Оның Қазақстан делегациясын ұзақ әрі көтеріңкі үнмен таныстыруы көрермендердің назарын аударып, әлеуметтік желіде кеңінен тарады.
Кейбір қолданушылар бұл сыйлықты Қазақстан мен Қырғызстан арасындағы достықтың белгісі деп бағалады. Ал өзгелері автокөліктің кімнің қаражатына алынғанын сұрады.
«Кімнің ақшасына? Өз қаражатына ма, әлде Көкпар федерациясының қаржысына ма?» — деп жазды пікір қалдырушылардың бірі.
Бірқатар қолданушы жүргізушінің BMW автокөлігінің жанында түскен бұрынғы суреттеріне назар аударып, оның қымбат көлігі бар деп болжады. Алайда суреттегі автокөліктің Жамгырчиеваға тиесілі екенін растайтын мәлімет жоқ.
«Жағдайы бар адамға емес, Қырғызстандағы мұқтаж отбасына сыйлағанда ғой», — деп жазды тағы бір қолданушы.
Осындай пікірлерді Қырғызстан тұрғындары да қалдырған.
«Көлікті аз қамтылған отбасыға сыйласын. Айзадада онсыз да автокөлік бар», — делінген пікірлердің бірінде.
Кейбір қолданушылар қымбат сыйлықты Қазақстан көкпар құрамасының өнерімен де байланыстырып, спортшылардың нәтижесі мен аттардың жағдайына наразылық білдірді. Бұл пікірлер қолданушылардың жеке көзқарасы саналады.
Жүргізушінің өзі уәде етілген автокөлікті әлі алмағанын айтты.
«Достар, маған сыйға берілген көлікті әлі алған жоқпын. Қолыма тигенде қуанышыммен міндетті түрде бөлісемін», — деп жазды Жамгырчиева.
Автокөліктің қандай қаражатқа алынатыны, моделі мен құны ресми түрде жарияланған жоқ.
