Грузиядан аса ірі көлемде алаяқтық жасады деген күдікке ілінген Қазақстан азаматы елге жеткізілді. Тергеу мәліметінше, күдікті ауыл шаруашылығы тауарын өндірушілерді қолдауға бөлінген бюджет қаражатын заңсыз иемдену схемасына қатысқан.
Күдіктіні Қазақстанға қайтару операциясын Бас прокуратура, Қаржылық мониторинг агенттігі және ІІМ Интерполының қызметкерлері Грузиядағы Қазақстан елшілігінің қолдауымен жүргізген.
Тергеу нұсқасына сәйкес, 2020-2023 жылдары әйел өз бақылауындағы шаруа қожалықтарын пайдаланып, асыл тұқымды малды сатып алу-сатуға қатысты жалған келісімшарттар мен өзге де құжаттар рәсімдеген. Осы құжаттардың негізінде жеңілдетілген несие мен мемлекеттік субсидиялар заңсыз алынған.
Келтірілген залал көлемі 238 млн теңгеден асқан. Қылмыстан кейін күдікті Қазақстаннан тыс жерге шығып, халықаралық іздеуге жарияланған.
Биыл наурызда ол Грузия аумағында ұсталды. Кейін Қазақстан Бас прокуратурасының сұрауы бойынша елге экстрадицияланды. Қазір күдікті тергеу изоляторында отыр.
Оған тағылған қылмыс дәлелденіп, сот кінәлі деп таныған жағдайда, 10 жылға дейін бас бостандығынан айырылып, мүлкі тәркіленуі мүмкін.
Бас прокуратураның мәліметінше, жыл басынан бері Грузиядан Қазақстанға халықаралық іздеуде болған жеті адам экстрадицияланған. Олардың бесеуі мүліктік қылмыс пен қаржы жымқыруға қатысты күдікке ілінген.
