Қазақстанда ғаламтор мен әлеуметтік желілер арқылы шетелден жұмыс іздейтін азаматтар арасында алаяқтарға алдану қаупі күрт өсті, деп хабарлайды SHYNDYK.KZ. Осыған байланысты ҚР Еңбек және халықты әлеуметтік қорғау министрлігінің Көші-қон комитеті отандастарымызға арнайы ескерту жасады.
Ведомствоның хабарлауынша, қазіргі уақытта Қазақстанда ресми тіркеуден өтпеген және заң аясынан тыс әрекет ететін рекрутерлер мен делдалдар көбейген. Мұндай күмәнді адамдар мен ұйымдарға жүгіну азаматтарды қаржылық шығынға батырып, ешқандай құқықтық кепілдік бермейді, соның салдарынан басқа мемлекетте өз құқығын қорғау мүмкін болмай қалады.
Сондай-ақ алаяқтық схемаларды ұйымдастырушылардың көп жағдайда республикадан тыс жерлерде орналасуы мәселені одан сайын қиындатады. Бұл олардың қайда жүргенін анықтауға және алданған азаматтардың құқықтарын дер кезінде қорғауға үлкен кедергі келтіреді.
Көші-қон комитеті қазақстандықтарға әлеуметтік желілердегі кездейсоқ хабарландыруларға сенбеуге және күмәнді делдалдарға алдын ала ақша аудармауға кеңес береді. Шетелге жұмысқа орналаспас бұрын делдалдың аккредитациясын, құжаттардың түпнұсқалығын және тиісті рұқсаттардың бар-жоғын мұқият тексеру қажет.
