Қырғызстан Президенті Садыр Жапаров қазақстандық экс-банкир Мұхтар Әблязовтың 2020 жылғы оқиғаларға байланысты айтқан мәлімдемелеріне жауап берді, деп хабарлайды SHYNDYK.KZ Super.kg ақпараттық порталына сілтеме жасап.
Көрші ел басшысының айтуынша, бұл қысқа телефон қоңырауы сол кезде жанында жүрген Мелис Аспековтің араласуымен болған. Әңгіме Әблязов айтып жүргендей 40 минутқа емес, бар болғаны екі минутқа ғана созылған. Диалог барысында қазақстандық оппозиционер Алмазбек Атамбаевтың кезінде алған қырғыз төлқұжаты барын алға тартып, Қазақстанда революция ұйымдастыру мақсатында Бішкекке келуге рұқсат беруді сұраған.
«Біріншіден, мен көрші елдердің ішкі саясатына араласпаймын. Екіншіден, сіз үшін Қазақстанмен арадағы қарым-қатынасты бұза алмаймын. Жақсысы, мұнда келмеңіз, өз ісіңізбен айналысыңыз», — деп Жапаров сол кездегі жауабын еске алды.
Сонымен қатар, Қырғызстан президенті Әблязовтан саяси науқан үшін ақша сұрады деген алыпқашпа әңгімелерді түбегейлі жоққа шығарды. «Егер ол осылай десе, демек, ол нағыз алаяқ. Мен одан ешқандай қаражат сұраған емеспін. Франциядағы жеке өмірі үшін қазақ халқынан теңгелеп ақша сұрап отырған адамнан мен көмек сұрады дегенге кім сенеді? Мені түрмеден алып шыққан қалың халық президенттікке де ешқандай ақшасыз сайлап алды», — деп түйіндеді мемлекет басшысы.
