Ресейде маймыл шешегін жұқтыру жағдайлары туралы ақпарат тарағаннан кейін Қазақстан шекарадағы санитариялық-карантиндік бақылауды күшейтті. Денсаулық сақтау министрлігі вирустың елге әкеліну қаупін жоққа шығармайды. Алайда инфекцияның халық арасында кеңінен таралу ықтималдығы төмен деп бағаланып отыр, деп хабарлайды SHYNDYK.KZ.
Министрліктің мәліметінше, шекарадағы өткізу пункттерінде жолаушылардың денсаулығына бақылау жүргізілуде. Әзірге көліктің барлық түрінде жүргізілген тексерулер барысында аса қауіпті инфекция жұқтырған немесе ауруға күдікті адамдар анықталмаған.
Маймыл шешегі (mpox) — адамнан адамға негізінен жақын физикалық байланыс арқылы жұғатын вирустық ауру. Инфекция науқас пайдаланған киім-кешек, төсек-орын және басқа да заттар арқылы берілуі мүмкін. Сондай-ақ ауру жұқтырған жануармен байланыс кезінде жұғу қаупі бар.
Аурудың негізгі белгілеріне дене қызуының көтерілуі, бас пен бұлшықеттің ауыруы, лимфа түйіндерінің ұлғаюы және әлсіздік жатады. Кейін теріде бөртпе пайда болып, ол сұйықтыққа толы көпіршіктерге айналуы мүмкін.
