Премьер-министр Олжас Бектеновтің төрағалығымен Экономикалық саясат жөніндегі кеңестің отырысы өтті. Жиында Қазақстан экономикасының өсімін жеделдету, шетелдік инвестиция тарту және шикізатқа тәуелділікті азайту мәселелері қаралды, деп хабарлайды SHYNDYK.KZ.
Халықаралық сарапшылар еліміздің өнеркәсіптік саясатын жетілдіруге қатысты ұсыныстарын таныстырды. Олар экономиканың шикізаттық емес салаларын дамыту, жеке кәсіпкерлікке қолайлы жағдай жасау және шетелдік капитал ағынын арттыру жолдарын ұсынды.
Кеңесте өңірлердің өндірістік мүмкіндіктерін тиімді пайдалану мәселесіне де назар аударылды. Атап айтқанда, аймақтардың өнеркәсіптік мамандануын дамыту, қазақстандық өнімдердің экспорттық әлеуетін кеңейту және стратегиялық инвесторларды тарту тәсілдері талқыланды.
Сонымен қатар қатысушылар әлемдік нарықтардағы ахуалды саралап, экономикалық өсімді ынталандыру шараларының тиімділігін арттыру жөнінде пікір алмасты. Негізгі мақсат — экономиканың тұрақты дамуына және халықтың әл-ауқатының өсуіне жағдай жасау.
Отырыс қорытындысы бойынша Олжас Бектенов жауапты мемлекеттік органдар мен ұйымдарға халықаралық сарапшылар ұсынған бастамаларды жан-жақты талдауды тапсырды.
