Қазақстан Президенті Қасым-Жомарт Тоқаев Ресейдің Ленинград облысының губернаторы Александр Дрозденкомен кездесті. Тараптар экономикалық ынтымақтастықты кеңейту және бірлескен жобаларды жүзеге асыру мәселелерін талқылады, деп хабарлайды SHYNDYK.KZ Ақордаға сілтеме жасап.
Кездесуде Мемлекет басшысы Қазақстан мен Ленинград облысы арасындағы сауда байланыстарының дамып келе жатқанын атап өтті. 2025 жылдың қорытындысы бойынша өзара тауар айналымы 400 миллион доллардан асқан.
Тараптар өнеркәсіп, атом энергетикасы, көлік және агроөнеркәсіп кешені салаларында бірлескен жобаларды іске асыру мүмкіндіктерін қарастырды. Сонымен қатар мәдени-гуманитарлық ынтымақтастықты кеңейту мәселелері қозғалды.
Александр Дрозденко Қасым-Жомарт Тоқаевқа Ресей Президенті Владимир Путиннің сәлемін жеткізді. Губернатор Екінші дүниежүзілік соғыс жылдарында Ленинградты қорғауға қатысқан қазақстандықтардың ерлігін ерекше атап өтті.
Кездесу соңында Қасым-Жомарт Тоқаев Қазақстан мен Ресей арасындағы одақтастық қатынастарды нығайтуға қосқан үлесі үшін Александр Дрозденконы II дәрежелі «Достық» орденімен марапаттады.
