Ақтөбе ферроқорытпа зауытының 200-ге жуық жұмысшысы еңбекақыны көтеруді талап етіп, кәсіпорын алдына жиналды, деп хабарлайды SHYNDYK.KZ. Зауыт хром кені мен ферроқорытпа өндіруден әлемдегі көшбасшылардың бірі саналатын Еуразиялық топтың (ERG) құрамындағы «Қазхром» ТҰК» АҚ-на тиесілі.
Жиналғандардың айтуынша, соңғы үш жыл ішінде олардың жалақысы мүлде көтерілмеген. Жұмысшылар қазіргі табыс отбасын асырауға және күн санап өсіп жатқан бағаның орнын жабуға жетпейтінін жеткізді. Металлургтердің сөзінше, қазіргі уақытта мамандардың басым бөлігі айына 380–400 мың теңге, ал балқытушылар 500–600 мың теңге көлемінде жалақы алады.
Қаржылық талаптардан бөлек, акцияға қатысушылар еңбек демалысын беру кезінде туындайтын қиындықтарды да тілге тиек етті. Жұмысшылар зауыт басшылығымен кездесіп, еңбекақыны көтерудің нақты мерзімдері мен жоспарлары туралы ресми жауап алу үшін кәсіпорын алдына жиналған.
