Ресейде маймыл шешегін жұқтырған бес жағдай ресми түрде расталды, деп хабарлайды SHYNDYK.KZ. Науқастардың барлығы Санкт-Петербург қаласында шұғыл түрде ауруханаға жеткізілген.
Ауру жұқтырғандар қазіргі уақытта С. П. Боткин атындағы клиникалық жұқпалы аурулар емханасында дәрігерлердің бақылауында ем қабылдап жатыр. Денсаулық сақтау мекемесінің мәліметінше, олардың жағдайы бірқалыпты, дерт жеңіл және орташа ауырлық дәрежесінде өтуде. Ал Роспотребнадзор өкілдері эпидемиологиялық ахуалдың толық бақылауда екенін мәлімдеді.
Ресейдегі жағдайға байланысты Қазақстан шекаралық өткізу бекеттерінде санитарлық-карантиндік бақылауды дереу күшейтті. ҚР Денсаулық сақтау министрлігі инфекцияның ел аумағына сырттан келу қаупін жоққа шығармайды, алайда оның республика халқы арасында кеңінен таралу қаупін өте төмен деп бағалап отыр.
