Астана тұрғындары Орталық саябақтағы су айдынының ластануына байланысты SHYNDYK.KZ редакциясына шағым түсірді. Олардың айтуынша, аққулар мен үйректер мекендейтін жерде пластик қалдықтары мен түрлі қоқыс жиналып қалған.
Редакцияға жолданған фотосуреттерден су жағасында жатқан пластик пен басқа да қалдықтарды көруге болады. Тұрғындар қоқыстың құстарға зиян тигізуі мүмкін екенін айтып, алаңдаушылық білдірді.
«Саябақты қоқыс алаңына айналдырған, аққулар пластик жеп жүр», – делінген тұрғындардың шағымында.
Қала тұрғындарының сөзінше, аққулар пластик қалдықтарын қорек ретінде жеп жүр. Алайда құстардың пластик жұтқаны әзірге ресми түрде расталған жоқ. Сондай-ақ су айдынының соңғы рет қашан тазартылғаны белгісіз.
SHYNDYK.KZ редакциясы жағдайға байланысты жауапты мемлекеттік органдарға сауал жолдады. Онда су айдынының тазалығына кім жауап беретіні, қоқыстың қаншалықты жиі жиналатыны және аққулар мен үйректерді қорғау үшін қандай шаралар қабылданып жатқаны сұралды.
