Астана халықаралық әуежайында жолаушылардың жеке басын биометриялық деректер арқылы анықтайтын жаңа жүйені сынақтан өткізу жоспарланып отыр. Жоба жасанды интеллект технологиясын қолдануды көздейді.
Қазақстанның Көлік министрлігі бұл бастама әуежайдағы ұшу алдындағы рәсімдерді жеңілдетіп, жолаушыларға қызмет көрсету уақытын қысқартуға мүмкіндік береді деп есептейді.
Жаңа технологияның тағы бір мақсаты – авиациялық қауіпсіздікті арттыру. Биометриялық сәйкестендіру жүйесі жолаушылардың жеке басын анықтау үдерісін автоматтандыруға бағытталған.
Әзірге жүйені енгізу туралы түпкілікті шешім қабылданған жоқ. Көлік министрлігі әзірлеген тиісті бұйрық жобасы қоғамдық талқылауға шығарылды. Талқылау 2026 жылғы 4 қарашаға дейін жалғасады.
