Орал қаласындағы №1 қалалық емхананы кеңейту туралы шешім 2023 жылы қабылданған. Бұған қолданыстағы ғимаратқа түсетін жүктеменің жоғары болуы себеп болған. Жоба бойынша ауданы 1,7 мың шаршы метрден асатын үш қабатты корпус салу жоспарланған. Жаңа ғимарат бір ауысымда 100 адамды қабылдауға есептелген.
Жоба 2024 жылғы қазанда мемлекеттік сараптаманың оң қорытындысын алған. Құрылысты Қазақстанның Ұлттық қорынан түсетін қаражат есебінен Инфрақұрылымды дамыту қоры арқылы қаржыландыру көзделген. Жобалық құжаттамаға сәйкес, құрылыс жұмыстарын аяқтауға сегіз ай қажет.
Алайда қажетті қаржы әлі бөлінбеген. Бұл туралы GOV.KZ мемлекеттік порталында жарияланған Батыс Қазақстан облысының Денсаулық сақтау басқармасы есебінде көрсетілген. Қаржыландыру мәселесі шешілмейінше, құрылыс жұмыстарын бастау мүмкін емес.
Жобаға қатысты тағы бір мәселе – емхана аумағындағы жасыл желектердің тағдыры. Құрылыс жоспары бойынша 15 ағашты кесу қарастырылған. Оның орнына шамамен 200 жаңа ағаш отырғызу жоспарланып отыр.
Осылайша, емхананы кеңейту туралы шешім қабылданғаннан бері үш жылға жуық уақыт өтсе де, құрылыс басталатын нақты мерзім белгіленбеген. Қаржының қашан бөлінетіні де әзірге белгісіз.
Осы жағдайға байланысты SHYNDYK.KZ редакциясы Батыс Қазақстан облысының Құрылыс басқармасы мен Денсаулық сақтау басқармасына ресми сауал жолдады. Редакция қаржыландырудың кешігу себептерін, құрылыс басталатын мерзімді, жобаға осы уақытқа дейін жұмсалған қаражат көлемін және ағаштарды кесу қажеттілігін анықтауды сұрады. Сонымен қатар жобаға жауапты органдар мен жасыл желектерді сақтап қалудың балама жолдары туралы ақпарат сұратылды.
