Маңғыстау облысының прокуратурасы алимент өндіру туралы сот актілерінің орындалуын қамтамасыз ету бағытында тиісті шаралар қабылдаған. Нәтижесінде балалардың пайдасына жалпы сомасы 37 млн теңге берешек өндірілген.
Прокуратураның мәліметінше, алимент төлеу міндетін орындамаған 22 борышкер әкімшілік жауаптылыққа тартылса, тағы үш борышкерге қатысты қылмыстық жауаптылық қолданылған.
Облыстық прокуратура кәмелетке толмағандардың құқықтары мен заңды мүдделерін қорғау, сондай-ақ алимент бойынша берешекті өндіріп алу жұмыстары жалғасатынын хабарлады.
