Бұған дейін SHYNDYK.KZ Кәрім Мәсімовтің бұрынғы күйеу баласы Азамат Капеновтың Қазақстанға қарсы 500 млн долларлық талап қойғанын жазған еді. Енді Әділет министрлігі редакция сауалына жауап беріп, істің қазіргі жағдайын түсіндірді.
Ведомствоның мәліметінше, 2026 жылғы 24 қыркүйекте Капеновтың атынан әрекет ететін Transcont Legal FZ LLE заң компаниясы Қазақстан билігіне инвестициялық дау жөнінде ресми хабарлама жолдаған. Мұндай құжат Президент Әкімшілігіне, Үкімет Аппаратына, Бас прокуратураға, Қаржылық мониторинг агенттігіне, Сыртқы істер және Көлік министрліктеріне де жіберілген.
Капенов өз талабын Қазақстан мен Қырғызстан арасында 2024 жылғы 19 сәуірде жасалған инвестицияларды өзара қорғау туралы келісімге сүйеніп негіздеген. Әзірге тараптар мәселені сотқа жеткізбей шешуге тырысып жатыр. Сондықтан министрлік кәсіпкердің нақты қандай талаптар қойғанын және мемлекеттің оған қатысты ұстанымын ашып айтпады.
Бұған дейін кәсіпкердің адвокаты Жанна Александрова SHYNDYK.KZ тілшісіне істің халықаралық арбитражға жолданғанын хабарлаған. Алайда Әділет министрлігі талап-арыздың арбитражға түскенін немесе істің ресми тіркелгенін нақтыламады.
Александрованың айтуынша, Капенов «Достық» пен «Алтынкөл» станцияларындағы теміржол терминалдарына және жүк вагондарына шамамен 54 млн доллар қаржы құйған. Адвокат даудың туындауын «Достық» станциясындағы терминалдың тәркіленуімен, 660 млн теңге көлемінде есептелген болжамды залалға қатысты келіспеушіліктермен және несиелерді субсидиялау мәселелерімен байланыстырды. Оның сөзінше, іс құжаттарында 7 млрд, 2,5 млрд және 468 млн теңге сомалары да кездеседі.
Министрлік осы мәселелерге қатысы бар қылмыстық іс бойынша тергеудің әлі аяқталмағанын мәлімдеді. Ал терминалдың тәркіленуіне, залалдың қалай есептелгеніне және несиелерді субсидиялауға қатысты сауалдарды тергеу органдары мен прокуратураға жолдауды ұсынды.
