Редакция дереккөздерінің мәліметінше, қылмыстық іс 2026 жылдың 21 сәуірінде адамдар тобының алдын ала сөз байласуымен аса ірі мөлшерде бөтеннің мүлігін жымқыру белгілері бойынша тіркелген.
9 қараша күні ҚТЖ басқарушы директорының міндетін атқарушы және «Тасымалдау процесінің дирекциясы» филиалының директоры, бұған дейін «ҚТЖ — Жүк тасымалы» ЖШС-ін басқарған Владимир Петров қамауға алынды. Тергеу оның Silk Way Petroleum компаниясымен жоғары бағамен келісімшарт жасасу кезіндегі әрекеттерінен 9,34 млрд теңге көлемінде нұқсан келді деп есептейді.
Сол күні, 9 қарашада «ҚТЖ — Жүк тасымалы» ЖШС бас директорының өндірісті қамтамасыз ету жөніндегі орынбасары Қайрат Қабылов та ұсталды. Оған қатысты эпизодта 7,25 млрд теңгеден астам ықтимал шығын көрсетілген.
10 қарашада қазіргі уақытта «Самұрық-Қазына» қорының Сатып алу әдіснамасы және бақылау департаментінің директоры, ал бұрын «ҚТЖ — Жүк тасымалы» мекемесінде сатып алуды қамтамасыз ету жөніндегі атқарушы директор болған Азамат Сембай қамауға алынды. Оған 2,08 млрд теңгеден астам қаражатты жымқырды деген айып тағылып отыр.
Барлық эпизодтарда бір ғана компания — «Silk Way Petroleum» ЖШС аталады. Тергеу материалдарында келісімшарт құнын асыра бағалау мен сатып алу рәсімдерін бұзуға байланысты шығын сомалары тиісті сараптама қорытындыларымен расталғаны атап өтілген. Бұл ретте қаржылық эпизодтардың өзара қабысатыны немесе жеке-жеке екені әзірге белгісіз. Қазіргі басты сұрақ — тергеу миллиардтаған теңгені жымқыру тетігі ретінде қарастырып отырған келісімшарттар ішкі бақылау мен келісудің барлық кезеңдерінен қалай кедергісіз өткен?
SHYNDYK.KZ редакциясы «Қазақстан темір жолы» ҰК» АҚ-на жағдайға түсініктеме беруді, Silk Way Petroleum компаниясымен келісімшарттарды бекіту кезіндегі ішкі бақылау тетіктерін ашып көрсетуді және ұлттық компанияның қаржылық мүддесін қорғау үшін қабылданған шараларды жария етуді талап етіп, ресми сауалнама жолдады, жауап күтеміз.
