Батыс Қазақстан облысында екі серіктестік суару жүйелерін салуға бөлінген 251 млн теңге мемлекеттік субсидияны жалған құжаттар арқылы алған. Қаражаттың бір бөлігіне тұрғын үй сатып алынған, деп хабарлайды SHYNDYK.KZ Қаржылық мониторинг агенттігіне сілтеме жасап.
Агенттік мәліметінше, мемлекеттік қолдау алу үшін «Агрокомплекс АРСЕН» және «ОнегеАгроСервис» ЖШС пайдаланылған. Олар Жәнібек ауданына қарасты Күйгенкөл ауылдық округінде суару жүйелерін салуға шығын жұмсағанын көрсеткен.
Алайда уәкілетті органға ұсынылған төлем тапсырмалары мен орындалған жұмыс актілері жалған болып шыққан. Осы құжаттардың негізінде екі серіктестіктің есепшотына жалпы сомасы 251 млн теңге субсидия аударылған.
АФМ дерегінше, бөлінген қаражат кейін қолма-қол ақшаға айналдырылған. Оның бір бөлігі тұрғын үй сатып алуға жұмсалған.
Сот шешімімен аталған жылжымайтын мүлікке тыйым салынды.
