Партия өкілі Юрий Ли сауалда келтірілген жағдайлардың бірін мысалға алды.
«Адам 32 мың теңге қарыз алған, енді 752 мың теңге қайтаруға тиіс», — деді ол.
Юрий Лидің айтуынша, платформа Қазақстанда лицензиясыз және тіркеусіз жұмыс істейді. Қарыз алушылар берешекті өтеу талабымен өздеріне ғана емес, туыстары мен жұмыс берушілеріне де қоңырау шалынатынын айтып шағымданған.
Ли партия өкілдері бұл мәселеге мамыр айында назар аударып, қолдарындағы материалдарды құқық қорғау органдарына тапсырғанын жеткізді. Алайда оның сөзінше, платформаның жарнамасы әлі де жарияланып келеді, ал азаматтардың шағымдары бір ведомстводан екіншісіне жолдануда.
Юрий Ли қылмыстық іс қозғалғанын айтқанымен, қарыз алушылардан өтініштер әлі де түсіп жатыр. Осыған байланысты «Ақ жол» фракциясы Бас прокурорға, Ішкі істер министріне және Қаржылық мониторинг агенттігіне депутаттық сауал жолдады.
«Бұл енді несие беруші мен қарыз алушы арасындағы жеке дау емес. Мұнда заңсыз несие беру қызметінің барлық белгісі бар. Қарапайым азаматтарды заңсыз несие берушілерден қорғау қажет екені анық», — деді Юрий Ли.
