Kpler сараптамалық компаниясының мәліметінше, қыркүйек айының басында Иран мұнайын тиеу көлемі тәулігіне шамамен 260 мың баррельге дейін азайған. Бір жыл бұрын бұл көрсеткіш 1,7 млн баррельге жуық болған.
Біріккен Араб Әмірліктері Иранмен сауда және қаржылық операцияларды тоқтатқаннан кейін қысым одан әрі күшейді. Бұған дейін Иранның сыртқы саудасы мен есеп айырысуының негізгі арналарының бірі БАӘ арқылы өткен.
Осы жағдайдың аясында ұлттық валюта бағамы рекордтық деңгейге дейін құлдырады. Бір жыл бұрын бір доллар шамамен 1 млн риал тұрса, қазір оның құны 2,2 млн риалдан асып кеткен.
Соңғы 12 айдағы орташа инфляция 69,9%-ға жетті. Ал азық-түлік, сусындар мен темекі өнімдерінің бағасы екі есеге жуық жылдам қарқынмен өсіп жатыр. Ресми жұмыссыздық деңгейі 9,1%-ға дейін көтерілді.
Экономикалық шектеулер санкцияларды айналып өтудің бұрынғы тәсілдерін қолдануды да қиындатып отыр. Делдалдар ынтымақтастықтан бас тартып жатыр немесе АҚШ-тың екінші реттік санкцияларына ұшырау қаупіне байланысты қызмет ақысының көлемін арттыруды талап етуде.
