Қаржылық мониторинг агенттігінің қызметкерлері Ақтөбеде есірткі бизнесіне қызмет көрсететін заңсыз төлем қабылдау схемасын әшкереледі. Жергілікті тұрғын әлеуметтік желілерде арнайы айырбастау пунктін ашып, бұл іске тағы жеті адамды тартқан. Қылмыстық топ күндізгі және түнгі ауысымдарға бөлініп, тәулік бойы жұмыс істеген.
Схема өте қарапайым болған: сатып алушылар ақшаны айырбастаушылар арқылы аударады, содан кейін оларға есірткі жасырылған орындардың координаттары беріледі. Топ мүшелері күніне 50-ден 70-ке дейін төлем қабылдап отырған. Бұл мақсатта бөтен адамдардың, яғни дропперлердің атына рәсімделген 22 банк картасы қолданылған.
Түскен қаражат одан әрі криптовалютаға айырбасталып, есірткі бизнесін басқарушылардың виртуалды әмияндарына жөнелтіліп отырған. Тергеу мәліметтеріне сүйенсек, аударымдардың жалпы көлемі 918 мың USDT-дан асқан, бұл 400 миллион теңгеден астам соманы құрайды.
Қазіргі уақытта қылмыстық топты ұйымдастырушы қамауға алынды. Тергеу амалдары жалғасуда.
