Мемлекет басшысы Қасым-Жомарт Тоқаев мәдениет және ақпарат министрі Арман Қырықбаевты қабылдады.
Кездесуде министрлік жұмысының алдағы басымдықтары талқыланды. Қасым-Жомарт Тоқаев мәдениет пен креативті индустрияларды одан әрі дамытуға ерекше назар аударды.
Президент тарихи-мәдени мұраны сақтау және оны кеңінен насихаттау жұмыстарын күшейтуді тапсырды. Сонымен қатар отандық мәдениеттің халықаралық деңгейдегі танымалдығын арттыру қажеттігін атап өтті.
Ақпараттық саясат мәселесі де назардан тыс қалмады. Мемлекет басшысы отандық ақпараттық кеңістіктің позициясын нығайтуды және заңнаманы қазіргі цифрлық өзгерістерге бейімдеуді тапсырды.
Бұдан бөлек, қоғамдық келісімді нығайту және жастардың шығармашылық әрі жасампаз әлеуетін жүзеге асыруға жағдай жасау бойынша жұмысты жалғастыру міндеті қойылды.
