Алаңдаған елордалықтардың айтуынша, медициналық мекемелерде дәрігер қабылдауына кіру үшін бірнеше сағаттап кезек күтуге тура келеді. Астана тұрғындарының бірі қызымен бірге кезекте 1 сағат 40 минут тұрғанын, ал бір күн бұрын ұлымен екі сағаттай күткенін жеткізді. Кейбір емханалардың сүзгі-кабинетінде тек бір ғана маманның қабылдау жүргізуі жағдайды одан әрі қиындатып жіберген. Кішкентай пациенттерге ұзақ күту өте ауыр тиіп жатыр: балалар жылап, ал кейбір ата-аналар дәрігердің қабылдауына кіре алмай, үйлеріне қайтуға мәжбүр.
Елорда тұрғындары қазір қалада қандай инфекцияның белсенді таралып жатқанына және медициналық мекемелерге неліктен осындай ауыр жүктеме түсіп отырғанына алаңдаулы.
Жағдайды анықтау үшін SHYNDYK.KZ редакциясы Астана қаласының Қоғамдық денсаулық сақтау басқармасына ресми сауалнама әзірлеуде. Біз қазіргі уақытта қандай вирустық инфекциялар өршіп тұрғанын, ЖРВИ белгілерімен жүгінгендер санының қаншалықты өскенін және ауырған балаларды уақытылы қабылдау үшін емханаларда медицина қызметкерлерінің жеткілікті немесе жеткіліксіз екенін білуді көздеп отырмыз.










