14 қарашада бір жасар бала Жылыой аудандық ауруханасынан Атырау облыстық инфекциялық ауруханасына санитарлық авиация арқылы жеткізілді. Сол кезде сәбидің жағдайы өте ауыр болған.
Облыстық денсаулық сақтау басқармасының мәліметінше, негізгі аурудың асқынуы салдарынан баланың өкпесі екіжақты қабынып, жедел тыныс алу және жүрек жеткіліксіздігі дамыған.
Дәрігерлер баланың өмірін сақтап қалу үшін барлық қажетті қарқынды емдеу шараларын жүргізген. Алайда сәбиді аман алып қалу мүмкін болмады.
Қайғылы жағдай Атырау облысында қызылшаға қатысты эпидемиологиялық ахуал күрделенген тұста тіркелді.
Ресми мәлімет бойынша, 1 қазан мен 17 қараша аралығында өңірде қызылша жұқтырудың 45 жағдайы зертханалық жолмен расталған.
Қазіргі уақытта жеті адам ауруханада ем қабылдап жатыр. Олардың төртеуінде қызылша диагнозы зертханалық тексеру арқылы расталса, тағы үшеуінде инфекцияға күдік бар.
Медицина мамандары алаңдатарлық жағдайға назар аударды. Қызылшаға байланысты ауруханаға жатқызылған науқастардың басым көпшілігі бұл инфекцияға қарсы екпе алмаған.
Қызылша әсіресе кішкентай балалар үшін қауіпті. Ауру асқынған жағдайда өкпенің қабынуына, жүйке жүйесінің зақымдануына және тыныс алу жеткіліксіздігіне әкелуі мүмкін.
Дәрігерлер қызылшадан және оның ауыр асқынуларынан қорғанудың негізгі жолы вакцинация екенін ескертеді.
Дегенмен денсаулық сақтау басқармасы ұсынған мәліметте қайтыс болған сәбидің қызылша жұқтырғаны расталды ма және ауру оның өліміне тікелей себеп болды ма — бұл жағы нақтыланбаған.










