Балқаш қаласына қарасты Саяқ ауылының маңында темір және марганец кендерін заңсыз өндіру тоқтатылды, деп хабарлайды SHYNDYK.KZ Қаржылық мониторинг агенттігіне сілтеме жасап. Белгілі болғандай, ауқымды қазба жұмыстары жер қойнауын пайдалану құқығынсыз және тиісті рұқсат құжаттарынсыз жүргізілген.
Тергеу мәліметтеріне сүйенсек, заңсыз кәсіпті «Vertex Co.» ЖШС және «MiningMetall» ЖШС басшылары ұйымдастырған. Олар жалдамалы жұмысшылар мен арнайы техниканы тартып, өндірілген шикізатты ұсақтап, одан әрі сату үшін теміржол станциясына тасымалдап отырған.
Аумақты қарау барысында жедел уәкілдер үш үлкен карьерді тапты. Қазып алынған топырақтың жалпы көлемі 338 мың текше метрді құрады. Салалық мамандардың есептеуінше, бұзылған жерлерді қалпына келтіру және карьерлерді рекультивациялау үшін 485 миллион теңге қажет.
Соттың санкциясымен күдіктілердің мүлкіне — екі арнайы техникаға, жеңіл көлікке және коммерциялық орынжайға тыйым салынды. Күдіктіге қатысты кепіл түріндегі бұлтартпау шарасы таңдалды. Сотқа дейінгі тергеу жұмыстары жалғасып жатыр.
