Партия төрағасы бұл сайлаудың тәуелсіз Қазақстан тарихында жаңа Конституция талаптарына сәйкес алғаш рет өткенін атап өтті. Оның айтуынша, Құрылтайдың алғашқы құрамын жасақтау Президент бастамашы болған ұлттық жаңғырудың жаңа кезеңіне жол ашады.
Нұрсұлтан Шоқанов сайлау учаскелеріне келіп, дауыс берген азаматтарға алғыс білдірді. Ол сайлаушылардың белсенділігін қоғамдағы саяси мәдениет пен ел болашағына деген жауапкершіліктің көрсеткіші деп атады.
Сондай-ақ партия басшысы Қазақстан Халық партиясын қолдаған сайлаушыларға ризашылығын жеткізді. Алдын ала экзитпол нәтижелері бойынша партияға сайлаушылардың кемінде 3 пайызы дауыс берген. Дегенмен ол бұл көрсеткіштің түпкілікті нәтиже емес екенін ескертті.
«Сіздердің сенімдеріңіз – біз үшін үлкен жауапкершілік. Халықтың үмітін ақтау үшін бар күшімізді саламыз», – деді Нұрсұлтан Шоқанов.
Ол биылғы сайлау науқанының белсенді әрі жаңа сипатта өткеніне назар аударды. Партия өкілдері төрт республикалық телеарнаның тікелей эфирінде бетпе-бет пікірталасқа шықты. Соның арқасында миллиондаған қазақстандық ашық пікірталасты көріп, саяси күштердің нақты ұстанымдарымен танысты.
Сайлау барысын жүздеген халықаралық және мыңдаған қазақстандық байқаушы бақылаған. Партия төрағасының пікірінше, бұл сайлау үдерісінің ашықтығын аңғартады.
Нұрсұлтан Шоқанов Президент жүргізіп жатқан реформалардың партия идеологиясымен үндесетінін айтты. Қазақстан Халық партиясы осы өзгерістерді жүзеге асыруға үлес қосып, сенімді серіктес болуға дайын екенін мәлімдеді.
Оның сөзінше, Құрылтай жұмысының басталуымен елдегі жаңарған саяси институттарды қалыптастыру үдерісі жалғасады.
«Барлық кандидат пен саяси партияға мазмұнды әрі бәсекелі науқан үшін алғыс айтамын. Бұл – саяси жүйеміздің кемелденгенінің белгісі», – деді партия төрағасы.
Қазақстан Халық партиясы дауыс беру нәтижесін объективті деп мойындайтынын және өзге саяси күштермен бірлесіп сындарлы жұмыс жүргізуге дайын екенін мәлімдеді. Партия алдағы қызметінің басты мақсаты ретінде әр қазақстандық отбасының әл-ауқатын арттыруды, Әділетті Қазақстанның тұрақтылығы мен сенімді дамуына үлес қосуды атады.
