20 қазан күні Алматыдан Павлодарға ұшып шыққан FlyArystan әуекомпаниясының FS-7131 рейсі межелі жерге 300 шақырымдай қалғанда Алматы әуежайына қайта қонды. Осыған байланысты кері бағыттағы FS-7132 рейсі де орындалмайтын болды.
Әуекомпания өкілдерінің түсіндіруінше, ұшу барысында Павлодардағы ауа райы күрт бұзылған. Нөл градус шамасындағы ауа температурасында жауын-шашын күтілгендіктен, келесі ұшу алдында әуе кемесіне міндетті түрде мұздануға қарсы арнайы сұйықтық шашылуы керек еді. Алайда Павлодар әуежайында мұндай өңдеу жұмыстарын жүргізу мүмкін болмаған. Ұшақтың қауіпсіз ұшып шығуына кепілдік жоқ болғандықтан, экипаж тәуекелге бармай, Алматыға оралу туралы шешім қабылдаған.
Мамандардың айтуынша, ұшақ сыртындағы мұз, қырау немесе қар қанатының аэродинамикалық қасиеттерін нашарлатады. Мұндай ауа райында арнайы тазартусыз ұшуға қатаң тыйым салынады. Сапары кейінге қалған жолаушыларға билет құнын толық қайтарып алу немесе орын табылған жағдайда таяу күндердегі рейстерге тегін ауыстыру мүмкіндігі ұсынылды.
