Тергеу нұсқасы бойынша, күдіктілер Olymp Casino, Rukh Poker және 7Kcasino интернет-казиноларына арналған төлем инфрақұрылымын ұйымдастырған. Ойыншылардан ақша қабылдау және оны өңдеу Rocket.do онлайн платформасы арқылы жүргізілген.
Болжамды схеманың қатысушыларының бірі шетел азаматы болған. Тергеу мәліметінше, ол 200 долларға дейін сыйақы үшін банк шоттарына қол жеткізуге келісетін адамдарды іздеген.
Ведомствоның дерегінше, табылған дропперлерді Қазақстанға әкелген. Кейін жеке сәйкестендіру нөмірін алу үшін халыққа қызмет көрсету орталықтарына апарып, банк шоттарын ашуға көмектескен.
Осылайша, күдікті 15 шетел азаматының банк шоттарына қол жеткізген. Бұған қоса, операциялар жүргізу үшін өзінің шотын да ұсынған. Ойыншылардан 16 адамның шотына түскен қаражаттың жалпы көлемі 110 млн теңгеден асқан.
Іс фигуранттарының бірі қамауға алынды. Тағы үшеуіне ешқайда кетпеу және тиісті мінез-құлық туралы қолхат түріндегі бұлтартпау шарасы қолданылды.
Қылмыстық іс сотқа жолданды. Қазақстан Қылмыстық-процестік кодексінің 201-бабына сәйкес өзге ақпарат жарияланбайды.
