Үкіметке алғашқы қайтып оралу туралы 2 қыркүйекте белгілі болды. Президент Қасым-Жомарт Тоқаев Мұхтар Тілеубердіні бұрынғы қызметінен босатып, сыртқы істер министрі етіп тағайындады.
Тілеуберді үшін бұл үш жылдан астам үзілістен кейін таныс ведомствоға қайта оралу болды. Ол алғаш рет Сыртқы істер министрлігін 2019 жылғы қыркүйекте басқарған. 2021 жылғы қаңтарда дипломат сыртқы істер министрі лауазымын сақтай отырып, Премьер-министрдің орынбасары қызметіне тағайындалды. Үкімет құрамында 2023 жылғы наурызға дейін жұмыс істеді.
Бірнеше айдан кейін Тілеуберді Қазақстанның Австриядағы елшісі және республиканың Венадағы халықаралық ұйымдар жанындағы тұрақты өкілі болып тағайындалды. Енді ол шетелдегі дипломатиялық қызметтен қайтадан Үкімет құрамына кірді.
Тілеуберді Қазақстанның тәжірибелі дипломаттарының бірі саналады. Ол Сыртқы істер министрлігі жүйесіндегі еңбек жолын 1993 жылы бастаған. Әр жылдары Қазақстанның шетелдегі өкілдіктерінде жұмыс істеп, елші және сыртқы істер министрінің бірінші орынбасары қызметтерін атқарды.
Тағы бір маңызды шешім — Әлібек Қуантыровтың Үкіметке оралуы. Президент Жарлығымен ол экология және табиғи ресурстар министрі болып тағайындалды.
Қуантыров бұған дейін де Үкімет құрамында болды, алайда ол кезде экономикалық блокқа жауап берді. 2021 жылғы ақпанда ұлттық экономика вице-министрі болып тағайындалып, 2022 жылғы қаңтардан 2024 жылғы ақпанға дейін аталған ведомствоны басқарды.
Министр қызметінен кеткеннен кейін Қуантыров KAZENERGY қауымдастығына жетекшілік етті. 2024 жылғы шілдеде сыртқы істер министрінің орынбасары болып тағайындалып, экономикалық дипломатия және инвестиция тарту мәселелерімен айналысты.
Осылайша, оның Үкіметке оралуы қызмет бағытының өзгеруімен қатар жүріп отыр: ұлттық экономиканы басқару мен сыртқы саяси ведомстводағы жұмыстан экологиялық саясат және табиғи ресурстарды пайдалану саласына ауысты. Қуантыров қаржы, лингвистика және қолданбалы экономика бағыттары бойынша білім алған.
Арман Қырықбаевтың тағайындалуы да таныс кәсіби ортаға қайта оралу іспетті болды. Мемлекет басшысының 3 қыркүйектегі Жарлығымен ол ішкі саясат, мемлекеттік коммуникациялар және ақпараттық күн тәртібінде рөлі артып келе жатқан Мәдениет және ақпарат министрлігін басқарды.
Жаңа қызметке тағайындалғанға дейін Қырықбаев Президент Қасым-Жомарт Тоқаевтың ішкі саясат және коммуникациялар мәселелері жөніндегі көмекшісі болды. Бұл лауазымды 2025 жылғы ақпаннан бері атқарды, ал оған дейін Президент Әкімшілігінің коммуникациялар бөлімін басқарған. Осылайша, ол ішкі ақпараттық саясаттың негізгі бағыттарымен жұмыс істеу тәжірибесін жинақтап, министрлікке тікелей президенттік басқару жүйесінен келді.
Мәдениет және ақпарат министрлігінің жүйесі Қырықбаев үшін жаңа емес. Ол 2006–2008 жылдары қоғамдық-саяси жұмыс және жұртшылықпен байланыс департаментін, кейін Мәдениет комитетін басқарды. 2012–2013 жылдары мәдениет және ақпарат вице-министрі қызметін атқарды.
Мемлекеттік қызмет жылдарында Қырықбаев Қарағанды облысы әкімінің орынбасары, екі рет Алматы қаласы әкімінің орынбасары болды, сондай-ақ Nur Otan партиясының хатшысы қызметін атқарды. Жаңа тағайындау оны кәсіби өмірбаянының елеулі бөлігі байланысты саласына қайта алып келді. Бұл жолы оның басқарушылық және саяси тәжірибесі әлдеқайда мол.
Осы тұрғыдан алғанда, Қырықбаевтың тағайындалуы жай ғана кадрлық ауыс-түйіс емес, мемлекеттің ақпараттық-коммуникациялық бағытын күшейтуге арналған шешім ретінде көрінеді. Президент Әкімшілігіндегі, ішкі саясат пен мемлекеттік коммуникациялар саласындағы тәжірибесі министрліктің алдағы жұмысындағы негізгі факторлардың біріне айналуы мүмкін. Әсіресе ақпараттық күн тәртібі мен мемлекет пен қоғам арасындағы байланыстың рөлі артып келе жатқан кезеңде бұл тәжірибенің маңызы жоғары.
Арман Қырықбаев 1976 жылы дүниеге келген. Қазақ мемлекеттік басқару академиясын және Сыртқы істер министрлігінің Дипломатиялық академиясын тәмамдаған. Мамандығы бойынша экономист және халықаралық қатынастар саласының маманы.
Тілеуберді мен Қуантыров Үкіметтен тыс қызмет атқарғаннан кейін қайта оралса, Қырықбаев бұрыннан таныс салаға келді. Ал Мұрат Мұхановтың тағайындалуы Төтенше жағдайлар министрлігі жүйесіндегі бірізді мансаптық өсудің нәтижесі болды.
Мұрат Мұханов 1985 жылы Маңғыстау облысында дүниеге келген. Қазақстан ТЖМ Көкшетау техникалық институтын және Ресей ТЖМ Мемлекеттік өртке қарсы қызметінің Санкт-Петербург университетін тәмамдаған.
Мұханов еңбек жолын 2006 жылы Маңғыстау облысының азаматтық қорғау құрылымында бастаған. Кейінгі жылдары өрт бақылауы саласындағы маманнан облыстық төтенше жағдайлар департаменті басшысының орынбасары, одан кейін департамент басшысы қызметіне дейін көтерілді.
2023–2024 жылдары Мұханов ТЖМ Өртке қарсы қызмет комитеті төрағасының орынбасары міндетін атқарды. Кейін Маңғыстау облысының Төтенше жағдайлар департаментін қайта басқарды. 2026 жылғы маусымда министрлік аппаратының басшысы болып тағайындалды.
Бірнеше айдан кейін Мұрат Мұханов Төтенше жағдайлар министрлігін басқарды. Өзге кадрлық шешімдерден айырмашылығы, оның тағайындалуы қайтып оралу емес, бүкіл кәсіби қызметін азаматтық қорғау және өрт қауіпсіздігі саласына арнаған бейінді маманның жоғарылауы болды.
Осылайша, соңғы кадрлық шешімдер Үкіметті жаңарту бірнеше бағытта қатар жүріп жатқанын көрсетеді. Бір тағайындаулар тәжірибелі басқарушылардың негізгі қызметтерге оралуымен ерекшеленсе, енді бірі Президент Әкімшілігіндегі лауазымды тұлғаның өзі жақсы білетін салаға ауысуын білдіреді. Ал үшінші бағыт — бейінді жүйенің негізгі сатыларынан өткен мамандарды қызметте жоғарылату.
Бұл кадрлық құрам саяси және басқарушылық тәжірибені нақты салаларды терең білумен ұштастыруға ұмтылысты аңғартады. Жаңа командаға тәжірибелі кадрлар қайта оралып, стратегиялық маңызы бар бағыттар күшейтілуде. Мемлекеттік құрылымдар ішінде түрлі деңгейде практикалық тәжірибе жинақтаған мамандарға да жоғары қызметтер сеніп тапсырылып отыр. Яғни бұл тек лауазымдарды алмастыру емес, тәжірибе, сабақтастық және кәсіби біліктілікке басымдық берілген басқарушы команданы қалыптастыру үдерісі.
