Бұған дейін Астана тұрғындары редакцияға Орталық саябақтағы су айдынында қоқыс пен түскен жапырақтардың жиналып қалғаны туралы шағымданған. Қала тұрғындары аққулар пластик қалдықтарын жұтып қоюы мүмкін деп алаңдаған.
Редакцияның ресми сауалына жауап берген Нұра ауданының әкімдігі «Magic Park Astana» ЖШС-не сілтеме жасап, жаз мезгілінде су айдыны күн сайын, ал күзде аптасына үш рет тазартылатынын хабарлады. Қоқыстың жиналуына түнгі уақытта желдің күрт күшеюі себеп болғаны айтылды.
Компанияның мәліметінше, ластану келесі күні жойылған. Тазалау жұмыстарынан кейінгі су айдынының жағдайын көрсететін бейнежазба да редакцияға ұсынылған.
Әкімдіктің хабарлауынша, аққулар мен үйректердің жағдайы оларды күнделікті азықтандыру кезінде бақыланады. Жауапты ұйымның мәліметінше, қазіргі уақытта құстардың жағдайына алаңдауға негіз жоқ.
Қыс түсер алдында су айдыны дәстүрлі түрде толық құрғатылады. Бұл шара аяз кезінде су айдынының тіреу қабырғаларын сақтауға бағытталған. Су деңгейі төмендегеннен кейін аққулар мен үйректер ұсталып, күзгі-қысқы кезеңді өткізу үшін алдын ала дайындалған ашық және жабық вольерлерге көшіріледі.
