3 тамызда Қазақстанның мемлекеттік орман қоры аумағында 13 орман өрті тіркелді.
Өрт Шығыс Қазақстан және Қарағанды облыстарында, сондай-ақ «Марқакөл» және «Қорғалжын» табиғи қорықтарының, «Баянауыл» және «Қарқаралы» мемлекеттік ұлттық табиғи парктерінің, «Ертіс орманы» мен «Семей орманы» орман резерваттарының, сонымен қатар «Жасыл аймақ» РМК аумақтарында анықталған.
Өрт ошақтарының басым бөлігі «Қазавиаорманқорғау» мекемесінің авиациялық патрульдеуі кезінде және орман өртін ерте анықтау жүйесінің көмегімен табылған.
Өртті ауыздықтау үшін су төгетін құрылғысы бар Ми-8 тікұшағы, авиациялық өрт сөндіру қызметінің қызметкерлері мен мемлекеттік орман күзетінің бөлімшелері жұмылдырылды. Министрлік кейбір өңірлерде өрт ошақтарын толық жою жұмыстары жалғасып жатқанын атап өтті.
Экология министрлігі күннің қатты ысуы мен найзағай ойнауына байланысты бірқатар өңірде өрт қаупі жоғары екенін еске салып, азаматтарды орманға барғанда сақтық шараларын қатаң сақтауға шақырды.
