Қаржылық мониторинг агенттігі 140 мыңға жуық азаматты емханаларға жалған тіркеп, көрсетілмеген медициналық қызметтер туралы жалған мәлімет енгізу схемасы әшкереленгенін мәлімдеді. Ведомство ақпаратына сүйенсек, әлеуметтік медициналық сақтандыру қорына келтірілген шығын 3,5 миллиард теңгеден асады. https://shyndyk.kz/kk/
Қазіргі таңда осы мәселе бойынша 36 қылмыстық іс тергеліп жатыр. Соның ішінде Түркістан облысындағы Жетісай аудандық ауруханасының лауазымды тұлғаларына қатысты іс те бар. Мұнда мемлекетке 501 миллион теңгеден астам шығын келген. Қазір екі күдікті қамауға алынды.
Бұдан бөлек, Астанадағы Forte Clinic жекеменшік клиникасы мен Алматы облысындағы Mydental.kz және Dr.Nurzhanova стоматологиялық клиникаларының басшыларына сот үкімі шықты. Тергеу мәліметінше, емделушілерді жалған тіркеп, көрсетілмеген қызметтерді рәсімдеу арқылы мемлекет қазынасына миллиондаған теңге көлемінде залал келтірілген.
Қаржылық мониторинг агенттігі мұндай заңсыз схемаларды анықтау жұмыстары әлі де жалғасатынын атап өтті.
