Криштиану Роналду мен Джорджина Родригес ресми түрде ерлі-зайыпты атанды. Жұлдызды жұптың үйленгені туралы әңгіме олар әлеуметтік желіде неке сақиналары тағылған суретін жариялағаннан кейін қызу талқылана бастады.
SHYNDYK.KZ хабарлағандай, бейресми мәліметтерге сүйенсек, жабық неке қию рәсімі 11 тамызда Португалияның Кашкайш қаласында өткен. Ғашықтар дүркіретіп той жасаудан бас тартып, бұл ерекше күнді тек ең жақын адамдарының ортасында өткізуді жөн көріпті. Сондай-ақ шағын тойда отбасының бес баласы да болғаны айтылуда.
Роналду мен Джорджинаның махаббат хикаясы 2016 жылы басталған болатын. Олар Мадридте танысқан, ол кезде бойжеткен бутиктердің бірінде кеңесші болып жұмыс істейтін. Көп ұзамай оларды жұрт жиі бірге байқай бастады, ал кейінірек футболшы мен оның сүйіктісі сезімдерін жасырмайтын болды.
Айта кетейік, 2025 жылдың 11 тамызында Джорджина гауһар тасы бар көз жауын алатын сақинасын көрсетіп, атастырылғанын сүйіншілеген еді. Тура бір жылдан соң олардың шаңырақ көтергені туралы жаңалық тарады. Дегенмен, жас жұбайлар салтанатты жиынның мән-жайын көпшілікпен бөлісуге асығар емес. Олар үйлену тойындағы ұзын-сонар репортаждар мен сансыз суреттердің орнына сақиналары көрінетін қарапайым ғана кадрмен шектелді.
Он жыл ішінде Роналду мен Родригес талай белесті бірге бағындырып, жанкүйерлер үшін баяғыдан-ақ толыққанды отбасы саналатын. Енді, тараған ақпараттарға қарағанда, жұп өздерінің одағын ресми түрде бекітуге түпкілікті шешім қабылдаған сыңайлы.
