Бекітілген аймақтық жобалар тізіміне Павлодардағы әуежайды қайта жаңарту, Шымкентте емхана салу, жылу және электр желілерін кешенді жаңғырту, сондай-ақ газ бен сумен қамту және индустриалды аймақтарды дамыту жобалары кірді.
Бұдан бөлек, депутаттық бастамалардың жалпы пакетіне Сәтбаев атындағы каналдан Астанаға дейін су құбырын тарту, шекаралық өткізу пункттерін жаңғырту, болашақ «Балқаш» АЭС-і бойынша ізденіс жұмыстарын жүргізу және өртке қарсы қорғаныс жүйесін күшейту енгізілген.
Сондай-ақ республикалық бюджет жобасына ауқымды әлеуметтік-экономикалық шаралар салынды:
🔹 Жалақының өсуі: 2027 жылдың 1 қаңтарынан бастап ең төменгі жалақы 85-тен 110 мың теңгеге дейін өседі. Бұл мақсатқа 75,9 млрд теңге бөлінді, өсім 370 мыңға жуық бюджет қызметкерін қамтиды.
🔹 Медицина қызметкерлерін қолдау: Алғашқы медициналық көмек көрсетудің учаскелік қызмет мамандарының жалақысы (үздіксіз еңбек өтіліне байланысты) 40%-ға дейін артады. Психологтар мен әлеуметтік қызметкерлерге жүктеме үшін қосымша ақы қарастырылған.
🔹 «Халықтық құрылыс»: Аталмыш бағдарламаға Ұлттық қордан үш жыл ішінде 5 трлн теңге бағытталады, оның ішінде 2027 жылы 2 трлн теңге жұмсалмақ. Қаражат жаңа ауруханалар, емханалар, алты перинаталдық орталық салуға, сондай-ақ жылу желілерін, қазандықтар мен электр станцияларын қайта жаңартуға жұмсалады.










