Орал қаласында жұмыс беруші қызметкерін жұмыс орнында үш сағаттан астам уақыт болмағаны үшін жұмыстан шығарған. Алайда бұл шешіммен келіспеген азамат сотқа жүгініп, қызметіне қайта орналастыруды талап етті.
Істі қарау барысында жұмыс берушінің қызметкерден жазбаша түсініктеме алмағаны анықталды. Ал еңбек заңнамасына сәйкес, тәртіптік жаза қолданар алдында жұмыс беруші қызметкерден түсініктеме талап етуге міндетті.
Осы рәсім сақталмағандықтан, сот жұмыстан шығару туралы бұйрықты заңсыз деп танып, азаматты бұрынғы қызметіне қайта орналастыру жөнінде шешім қабылдады.
Сондай-ақ жұмыс берушіден қызметкердің пайдасына амалсыз жұмыссыз жүрген уақыты үшін 2 315 515 теңге, ал соттағы өкілінің қызметіне кеткен шығын ретінде тағы 350 мың теңге өндірілді.
Осылайша қызметкерге төленуге тиіс жалпы сома 2 665 515 теңгені құрады.
