Әлеуметтік желіде танымал блогер әрі «Respublica» партиясынан Құрылтай депутаттығына үміткер Бейбіт Әлібековке қарсы ауқымды кампания өршіп тұр. Бұған оның әкесі Бақыт Әлібековтің Facebook желісіндегі атышулы жазбалары себеп болған. Threads және TikTok қолданушылары оның парақшасынан оқырмандардың жағасын ұстатқан жазбаларды жаппай таратуда. Ер адам өз жазбаларында қазақтарға тіл тигізіп, наразылық білдірген отандастарын «қазанбастар» және «кастрюльбастар» деп кемсіткен. Ал бір жазбасында әлемдік қастық (заговор) теориялары туралы сөз қозғай келе, Ресей президентіне алғыс айтып, ашықтан-ашық ресейшіл ұстанымын білдірген.
Блогер отбасының айналасындағы дауды оның бұрынғы әйелі Дана Қарағұсоваға қатысты тағы бір шу ушықтыра түсті. Желі қолданушылары отандық концерт нарығындағы мәселелер үшін оны қатаң сынға алып, билет бағасын негізсіз «аспандатып» жібергені және ауқымды шоуларды ұйымдастыру деңгейінің төмендігі үшін айыптауда.
Қоғамдық резонанс пен оны сайлаудан шеттету туралы үндеулер күшейген тұста, Бейбіт Әлібеков әкесінің ұстанымынан шұғыл түрде бас тартуға тырысты. Блогер Threads желісіндегі парақшасында әкесінің көзқарасын қолдамайтынын түсіндіріп, қазақ тілінде жазба жариялады:
«Барлығымыз ата-ананы таңдамаймыз, олар да бізді таңдай алмайтыны — анық. Әкемнің көзқарастары мен пікірлерін ешқашан қолдаған емеспін және бұл туралы бірнеше рет ашық айттым… Баласы әкесінің айтқан сөзі немесе жасаған әрекеті үшін жауап беруге тиіс емес деп ойлаймын. Сондықтан мен саналы, жасы келген тұлғаның пікірі үшін ақталуға құқығым жоқ», — деп жазды кандидат. Ол сөзін: «Ізгі ниетпен, біріңізге аға, біріңізге іні, біріңізге көке, біріңізге ұл, ал біріңізге жай ғана адам — Бейбіт», — деп түйіндеген.
Алайда бұл жазба жағдайды бәсеңдеткен жоқ, керісінше, оның беделіне тағы бір соққы болып тиді. Пікір қалдырушылар мәтіннің табиғи емес екенін, машиналық аудармаға тән қателер мен шаблонды сөз тіркестеріне бірден назар аударған. Оқырмандар блогердің ана тілін білмейтінін бетіне басып, жасанды интеллектіні пайдаланғаны үшін ашық келеке етті. Желі қолданушыларының пікірінше, ақталу мәтіні ChatGPT арқылы жазылған, сол себепті аудиторияға айтқан уәжі тым жасанды әрі шынайы емес болып көрінген. Әлібековтің нейрожелі туралы айтылған ыңғайсыз пікірлерді жаппай өшіре бастауы жағдайды одан сайын ушықтырып жіберді.
Қазіргі уақытта дау әлеуметтік желінің шеңберінен шығып, күн санап қызып барады. Наразы қазақстандықтар «e-Otinish» мемлекеттік платформасы арқылы жаппай ресми шағым түсіріп, Бейбіт Әлібековті сайлау додасынан шығаруды және оның әкесінің атышулы жазбаларына құқықтық баға беруді талап етіп жатыр.
