Шымкент қаласының Күншығыс шағын ауданында қайғылы жағдай тіркеліп, жалдамалы пәтерде екі бала көз жұмды. Қаза тапқандар — төрт жасар ұл мен он бес жастағы жасөспірім қыз. Тағы үш адам жедел түрде ауруханаға жеткізілді, соның ішінде үш жасар бүлдіршін жансақтау бөлімінде жатыр.
Оқиға 19 қазан күні болған. Аталған пәтерді екі отбасы жалдап тұрған. Құзырлы органдар қайғылы оқиғаға улы газ себеп болды деген алдын ала болжам жасап отыр.
Тексеріс барысында пәтер ішінде газбен істейтін су жылытқыш орнатылғаны анықталды. QazaqGaz Aimaq мамандарының айтуынша, бұл көпқабатты үйдің жобасы тек газ плиталарын пайдалануға арналған. Дегенмен оқиға орнына барған апаттық қызмет мамандары ауада улы газ шоғырын таппаған. Балалардың нақты неден көз жұмғанын сарапшылар анықтайтын болады.
Қазіргі уақытта полиция қылмыстық іс қозғады. Тергеушілер оқиғаның толық мән-жайын зерттеп, газ жабдығын пайдалану кезіндегі қауіпсіздік ережелерінің бұзылған-бұзылмағанын анықтайды.
